नमोबुद्ध क्षेत्र विकास समिति

भगवान गौतम बुद्धले ५०० जन्म पशु प्राणी र ५०० जन्म मानव प्राणीको रूपमा गरी हजार जन्म लिनुभएकोमा, ९९९औँ जन्ममा पनौती स्थित राजदरबारमा सिङ्दाङ ग्यालबो धर्म राजाको कान्छो छोरा भई जन्म लिनुभएको थियो।

धर्मग्रन्थमा उल्लेख छ कि धर्म राजाका तीन भाइ छोरा थिए — जेठो डाछेन्पो, माइलो लाछेन्पो र कान्छो ङिञ्जेछेन्पो। उहाँहरू तीनै भाइ नमोबुद्ध वनमा अवलोकन भ्रमणमा आउनुहुँदा घना जङ्गलमा पाँचवटा डमरुहरू रहेको एउटी सुत्केरी बघिनी खाना खान नपाएर मृत्युको क्षणमा पुगेको अवस्था देख्नुभयो।

आमा बघिनी र पाँचवटा डमरु गरी ६ जनाको प्राण जाने निश्चित भएको देखेपछि कान्छो राजकुमार महासत्व ङिञ्जेछेन्पोले जसरी पनि आमालाई बचाउनुपर्छ भनी दुई दाजुहरूको आँखा छली आफ्नो औँलाको रगत लगायत तिघ्राको मासुदेखि शरीर नै दान गर्नुभयो।

पनौती राजदरबारमा आमाले सपनामा काउसीमा भएका तीनवटा परेवामध्ये एउटा परेवा बाजले लगेको र आफ्नो दाहिने पट्टिको दूध बाघले खाएको देख्नुभयो। बिउँझिँदा डरले विलाप गर्दै राजालाई सुनाएपश्चात् केही छिनमा राजकुमार ङिञ्जेछेन्पो जीवित नरहेको खबर आयो।

यही पवित्र घटनास्थल नमोबुद्धलाई विश्व सम्पदा सूचीमा सूचीकृत गराउने प्रयास भइरहेको छ।